show me wolves

showmwwolves

Hljómsveitir spretta upp um þessar mundir eins og illgresi og fyrir vikið hrjáir lúxusvandamál þjóðina. Það eru ekki lengur sömu þrjár hljómsveitirnar að spila sömu lögin á sama staðnum. Það eru ekki lengur mörg ár á milli hljómplatna íslenskra þungarokkshljómsveita og er það, vægast sagt, gaman að geta sagt svo vera.

Ein af þessum nýju íslensku hljómsveitum sem spretta upp eins og eldfjöll í íslenskri náttúru er Show Me Wolves, sem stofnuð var af Herði Lúðvíkssyni, gítarleikara harðkjarnasveitarinnar Grit Teeth. Hljómsveitin gaf fyrir stuttu út Between Man, God and False Idols, og brátt kemur önnur breiðskífa hennar út. Ég náði í skottið á Herði og spurði hann aðeins út í málið.

showmewolves

Hvenær var Show Me Wolves stofnuð?

Ég stofnaði Show Me Wolves í febrúar 2015. Ástæðan fyrir því að ég stofnaði þetta verkefni var sú að ég átti slatta af lögum sem ég hef ekki getað notað í öðrum hljómsveitum sem ég hef verið í eins og t.d. Grit Teeth og Offerings. Mig langaði að prufa að gefa út þessi lög á geisladisk og sjá hvaða viðbrögð ég myndi fá.
Seinna meir fór ég að taka eftir að fjölmargir hlusta á þetta og hafa gaman af þessu þannig ég ákvað að halda áfram með þetta.

Einhverjar breytingar á meðlimaskipan íhugaðar til þess að koma fram á tónleikum?

Ég er núna að vinna í því að prufa tónlistarmenn sem hafa áhuga á því að spila þetta live. Eftir að ég gaf út fyrstu plötuna, “Between Man, God And False Idols”, fóru að detta inn tilboð um það að spila live og ætla ég ekki að láta þau tilboð sleppa frá mér.

Hverjir eru helstu áhrifavaldar Show Me Wolves?

Tja, það er mismunandi eftir dögum og skapi mínu. Ég hlusta mjög mikið á Mastodon, Obscura, Beyond Creation, Behemoth, Inquisition, Periphery, Animals as Leaders, Deathspell Omega, Fallujah, Mechina, 1349 og ég gæti í rauninni haldið endalaust áfram.

Þegar ég heyrði fyrst af SMW þá var hún kynnt fyrir mér sem nýmóðins Black Metal, en ég er nokkuð ósammála því. Heyri mun meiri Post Metal í tónlistinni. Sammála? Ósammála? Hvar setur þú SMW?

Það er alveg rétt, það má jú heyra ákveðna Black Metal kafla í þessu og kápan á fyrstu plötunni að sjálfsögðu öskrar Black Metal en ástæðan fyrir því að Show Me Wolves var tengt við Black Metal var aðallega vegna þess að gagnrýnendur flokkuðu þetta þannig. Ég hef aldrei verið of upptekinn af því að fylgja einhverri tónlistarstefnu eða einhverju trendi, í staðinn ákvað ég að semja tónlist sem ég myndi hlusta á, ef fólk fílar það þá er það gott mál og ef ekki þá er það bara þannig.
Ég hef oft verið spurður að því undir hvaða tónlistarstefnu ég flokka Show Me Wolves og ég segi aðallega að það sé undir hlustendum mínum komið að flokka Show Me Wolves í ákveðna tónlistarstefnu, það er ekki mitt verk. ég ákvað að tagga hljómsveitina með Black Metal, Death Metal, Hardcore og Metalcore því það er það sem ég heyrði annað fólk segja um hljómsveitina.

Hvað er svo framundan?

Það er nóg framundan fyrir Show Me Wolves. Nýjasta platan, “The World They Took Over”, kemur út núna í janúar á næsta ári og við munum vonandi spila á einhverjum tónleikum á landinu sem fyrst. Einnig er Show Me Wolves staðfest á Evróputúr í ágúst á næsta ári sem er á vegum Merdumgiriz Records sem er labelið sem ég er að vinna með og mun það tónleikaferðalag hefjast hér á Íslandi. Ég er núna að vinna með tveimur labelum, annað þeirra er Merdumgiriz Records frá Bretlandi og hitt er False Beings Productions en það er label sem ég stofnaði fyrir mjög stuttu síðan.
Ég mun á komandi vikum og mánuðum vonandi fá fleiri artista til að signa við mig á það label þannig ég geti hjálpað þeim að koma sér á framfæri. Ég stefni að því að halda áfram með Show Me Wolves um komandi ár, vonandi bara sem lengst.
Að lokum vil ég benda öllum á að kíkja á vefsíður sem eru á vegum hljómsveitarinnar, like-a okkur á Facebook​​ og kíkja á listamanninn Skaðvald á Facebook, hann hannaði artworkið á nýju plötunni og er gríðarlega hæfileikaríkur.

der weg einer freiheit – einkehr

Það er ekki langt síðan áhugasömum lesendum Andfara bauðst að hlusta á glænýtt lag með þýsku hljómsveitinni Der Weg einer Freiheit og í dag verður leikurinn endurtekinn.

Eins og einhver hefur eflaust giskað á, þökk sé Primordial bolnum sem einn meðlima DWeF er í og Marduk bótinni á gallajakka annars, er hér um djöflarokk að ræða.

Í dag er boðið upp á textamyndband við lagið “Einkehr” sem er einnig tekið af væntanlegri plötu sveitarinnar, Stellar, sem kemur út á vegum Season of Mist 23. mars næstkomandi. Það er um að gera að kíkja á þessa hljómsveit því á bakvið sakleysislegt útlitið leynist nokkuð góð tónlist.

hindurvættir

mynd: daníel starrason texti: eyvindur gauti
mynd: daníel starrason, fengin af fésbókarsíðu sveitarinnar
texti: eyvindur gauti

Ein af þeim hljómsveitum sem báru af á síðasta Eistnaflugi, að mínu mati, var Hindurvættir, frekar ung hljómsveit frá höfuðborg Norðurlands, Akureyri. Lítið hafði ég þó heyrt af þeim frá því þá, þótt þeir hafi spilað fyrir norðan síðan, og sendi ég þeim því tvær spurningar til forvitnast um hagi þeirra.

Núna hefur hljómsveitin verið frekar þögul síðustu mánuðina. Slíkt er kannski ekki mikið í augum meðlima sveitarinnar en í augum sumra áheyrenda eru þetta aldir, hvað er að gerast í búðum Hindurvætta þessa dagana?
Við erum að byrja upptökur á okkar fyrstu breiðskífu sem hefur verið í smíði seinasta árið. Það er mikil vinna búin að fara í hana en við frumfluttum nokkur lög á Eistnaflugi í sumar við ágætis undirtektir. Einnig þá er planið að hafa útgáfuna með frekar óhefðbundnu sniði og við erum mjög spenntir að sjá hvað kemur út úr því.
Hljóðsviðið er töluvert stærra en fyrra efni og við bættum við okkur auka meðlim (Bjarni Jóhannes/Gítar-söngur) til að gera live flutning á því mögulegan. Við erum að draga meiri áhrif frá klassísku (progressífu) rokki, það gleymist oft að það er ennþá nóg að sækja í áttunda áratuginn þó að margt gott sé í gangi í dag.

Hvaðan kemur þessi mikli áhugi á Post (Black) Metal? Hvaða hljómsveitir eru það sem hafa haft mest áhrif á ykkur? Þið sjálfir líktuð ykkur við hljómsveitir eins og Alcest, Agalloch og Urfaust þannig að svarið liggur hálfveginn þar en bilið er ágætlega breytt samt sem áður bara á milli þessara þriggja sveita. Í framhaldi af þessu, hver finnst þér vera helsti munurinn á Black Metali og því sem margir vilja að meina að sé óskilgetið afkvæmi þessi: Post Black Metal?
Það að kalla stefnuna Post (Black) Metal var kannski frekar tilraun á sínum tíma til að finna farveg fyrir hvert bandið vildi stefna. Við vorum (og erum) með ákveðnar hugmyndir bakvið tónlistina, hvaðan áhrifin eru að koma og hvað hægt væri að kalla það. Okkur langaði að spila tónlist sem endurspeglar náttúruna á Íslandi, árstíðirnar, fólkið og daglegt líf. Skammdegisþunglyndi, manían sem fylgir sólbjörtum sumarnóttum og allt þar á milli. Í upphafi þótti okkur við hæfi að kalla þetta þessu nafni þar sem andrúmsloftið sem Black Metal skapar er einmitt í þessa átt. Hinsvegar eftir því sem bandið hefur þróast þá finnst okkur þetta hreinlega ekki lýsa því sem við erum að reyna tjá.
Í rauninni myndi ég ekki flokka Hindurvætti í stefnu sem tengist Black Metal, það eru ákveðin áhrif sem við drögum frá þeirri stefnu, en þau eru meira tengd andrúmsloftinu sem tónlistin skapar heldur en tónlistinni sjálfri og þeim “reglum” sem eru innan stefnunar.
Andrúmsloftið er líklega einn mikilvægasti partur Black Metal, það geta held ég flestir verið sammála um. Hindurvættir reyna að skapa andrúmsloft sem er ef til vill líkt, en frá allt öðrum stað og í allt annari meiningu.
Black Metal hefur verið ágætlega skilgreint með þróun senunar seinust tvo áratugi en í dag eru til óendanlega margar hliðarstefnu sem erfitt er að setja í flokka. Post Black Metal er í mínum huga ekkert voða gott nafn á hliðarstefnu en þangað til einhver kemur með betra nafn þá verður það að duga. Það má deila um það hver eiginlegi munurinn er á “true” Black metal og öðrum hliðarstefnum er en sameiginlegt eiga þær að andrúmsloftið skiptir meginmáli.
Okkar helstu áhrifavaldar í augnablikinu eins ég minntist á í upphafi eru bönd frá gullöldinni í klassísku rokki. Það er ennþá nóg að læra af böndum eins og Pink Floyd, Wishbone Ash, Black Sabbath og Rush. Auðvitað eru líka áhrif frá svartmálmi þá helst Wolves in the Throne Room og fleiri böndum úr þeirri stefnu. Þá má líka nefna goðin í Neurosis og önnur Post Metal bönd. Við erum allir með frekar ólíkan bakgrunn tónlistarlega og komum allir með okkar í lagasmíðarnar sem virðist virka nokkuð vel. Við getum ekki beðið eftir að leyfa fólki að heyra nýja efnið!  

 Heimasíða hljómsveitarinnar