nýtt undir nálinni: armored saint, asphyx, hereza, obituary, ravencult, skinned

Myndin hér að ofan er tekin af Fjasbókarsíðu Skinned. Hljómsveitin er greinilega mætt á klakann!

Það var nóg að gera í gær. Andfarinn var með þrjár frumsýningar í gær. Ekki eina, ekki tvær, heldur þrjár. Ég mæli sérstaklega mikið með þeirri þriðju!

Í kvöld verður dauðarokksveisla á Gauknum, þetta er fyrsta upphitunin fyrir Reykjavík Deathfest: Part II (This time it’s personal) og þar koma fram hin ameríska Skinned ásamt hinum íslensku Severed, Hubris og Grit Teeth. Þúsund kall inn og málið er dautt.

En, á meðan ég var í vinnunni í gær var greinilega mikið að gerast. Þegar ég kíkti í pósthólfið að vinnu lokinni var nóg af nýrri, og gamalli, tónlist þar að finna svo kíkjum á smá af því.

Armored Saint. Metal Blade Records skelltu þessu lævmyndbandi á Netið í gær. Þarna sjáum við John Bush, sem seinna meir gekk til liðs við Anthrax, í góðum gír ásamt félögum sínum. Ég hef ekki hlustað mikið á Armored Saint í gegnum tíðina en miðað við þetta lag hefði strákurinn alveg eins getað sleppt því að skipta um hljómsveitir. Skuggalega líkt Anthrax.

Ravencult. Höldum okkur áfram hjá Metal Blade Records en færum okkur frá Ameríku yfir til Grikklands og úr þungarokki yfir í djöflarokk. Mig minnir að ég hafi haft gaman af síðustu plötu hljómsveitarinnar, sem kom út á vegum Hells Headbangers fyrir þremur árum, og miðað við þetta lag á ég líka eftir að hafa gaman af þeirri sem er væntanleg í byrjun nóvember.

Hereza. Frá grísku djöflarokki förum við í króatískt dauðarokk. Pólska útgáfan Godz ov War er með þetta á áætlun snemma á næsta ári og þetta virðist nú vera eitthvað til þess að láta sér hlakka til þá. Ég er allavega búinn að bæta aðeins við áhorfstölurnar á þessu myndbandi.

Obituary. Relapse Records mun gefa út maxi-singúlinn 10000 Ways to Die í næsta mánuði og er að reppa hann smá núna með því að hleypa lagi á Netið öðru hverju. Núna er það læv-upptaka af “Intoxicated”. Hljómar ágætlega.

Asphyx. Endum þessa yfirferð á dauðarokksgoðsögnunum í Asphyx. Hljómsveitin er búin að vera starfandi, með hléum, í næstum þrjátíu ár núna. Næsta föstudag, sama dag og nýja Skálmaldar platan kemur út, kemur nýja Asphyx platan út. Platan ber titilinn Incoming Death og kemur út hjá Century Media. Þetta lag er ekki að grípa mig neitt rosalega, en ég ætla ekki að afskrifa plötuna strax. Ekki fyrr en ég er allavega búinn að hlusta á hana alla.

Author: Andfari

Andfari