abominor, dr. gunni, dulvitund og the vintage caravan

Ég er að reyna að vera skipulagðari og muna eftir viðburðum sem eru framundan en það gengur á stundum hálf brösuglega. Í raun er ég mun betri í að muna eftir tónleikum og öðru slíku eftir að þeir hafa átt sér stað.

Ýmiskonar öpp og allskonar fítusar á samskiptamiðlum, sem láta mig vita af nálægum viðburðum, eru því sem himnasending fyrir mig því án þeirra vissi ég eflaust ekki af meirihluta þeirra viðburða sem ég kemst ekki á. Í þessari viku eru til dæmis nokkrir viðburðir sem mig langar á, hvort sem ég á svo eftir að komast á þá eður ei.


Dr. Gunni, sem er í augnablikinu landsins helsti poppfræðimaður, verður með tónleika í Lucky Records nú á miðvikudaginn. Tónleikarnir eru haldnir í tilefni fimmtugsafmælis kappans og mun hann einnig gefa út tíu tommu vínilplötu sem gefin verður út í færri eintökum en nokkur svartmálmsskífa og er þegar uppseld í forsölu. Indípopparar eru svo sannarlega miklu meira kvlt en kvltkrúttin í svartmálmnum. Það kostar ekkert inn á þessa tónleika, Vídeósílin eru sérstakir gestir og Coca Cola verður á boðstólnum með öllu þessu poppi. Já, og tónleikarnir byrja klukkan fimm. 17:00.


Á fimmtudaginn mun Hið myrka man halda utan um útgáfutónleika Dulvitundar á Gauknum. Tónleikarnir eru haldnir í tilefni útgáfu breiðskífunnar Lífsins þungu spor, og munu Döpur og Ultraorthodox einnig koma þarna fram. Það mun kosta þúsund krónur inn, hljómplata Dulvitundar verður fáanleg fyrir tvö og fimm, og húsið opnar klukkan átta.


Ef fimmtudagurinn gerir ekki út af við þig þá er hætt við að föstudagurinn geri það því bæði Abominor og The Vintage Caravan verða með útgáfutónleika það kvöldið.
Vintage halda sína tónleika í Gamla Bíó, Arrival verður flutt í heild sinni ásamt eldra efni, tónleikarnir hefjast klukkan tíu og það kostar 2900 krónur inn.


Abominor verða hins vegar á Gauknum sama kvöld ásamt Mannveiru, AMFJ, Nöðru og Dulvitund. Það gæti verið erfitt að velja á milli Gamla Bíós og Gauksins þetta kvöldið en ef það auðveldar eitthvað valið þá þurfa tónleikar Vintage að klárast snemma vegna nágranna, en Gaukurinn þarf ekkert að hafa áhyggjur af slíku. Því væri hægt að byrja í hipparokkinu og færa sig svo í svertuna seinna um kvöldið. Þúsund krónur inn og kassettur og geisladiskar til sölu.

Gefið út af